"Gure komunitatearen ongizatean eragingo dugu esperientziak elkartrukatuz; elkar argituz"

Rober Gutiérrez Ziurtagiriaren Elkarteko zuzendariak Bai Euskarari Sarien ekitaldian zabaldutako mezua

Gaurkoa bezalako egunetan atzera begiratzeko joera izaten dugu eta egindako bidetik, lorpenak azpimarratu, abiatutako proiektu arrakastatsuak nabarmendu, eta aurrera  begirako erronkak zehaztu ohi ditugu.

Zalantzarik eta konplexu izpirik gabe, harro egoteko moduko ibilbidea da Bai Euskararirena, eta pozik egoteko modukoa da Bai Euskarari komunitatea osatzen duten Euskal Herri osoko milaka entitatek urte hauetan eragin dutena. Ez dezagun ahantzi  horixe dela gure helburua, alor sozioekonomikoaren euskalduntzean eragitea, lan  mundutik hasi eta gizartearen gainerako espazioen euskalduntzean eragitea. Ez da ez lan makala. Urte hauetako lan eredugarri eta haien borondatezko konpromisorik gabe,  nekez egongo ginateke oraingo egoeran. Eragin dugu. Eragiten ari gara eta eragiten  segituko dugu.

Alor sozioekonomikoaren espazioetan euskalduntzearen eragiteari begirako proiektuak lantzen eta sortzen ari gara

Alor sozioekonomikoaren espazioetan euskalduntzearen eragiteari begirako proiektuak lantzen eta sortzen ari gara, gure azken hausnarketa estrategikoan zehaztu zen bezala.  Bai Euskarari Ziurtagiria, Enpresarean - Enpresa eta profesionalen sarea, eta Lansarean  lan-atarirekin batera, gaurkoan nabarmendu nahi dut azken adibidea, “Lanabes - Araban Euskara Lanean” proiektua, ekainaren erdialdean aurkeztu zena eta 2015etik  elkarlanean garatzen ari garena Arabako beste hainbat aktorerekin batera (Arabako Foru  Aldundia, SEA - Arabako Enpresariak, Arabako Merkataritza eta Industria ganbara,  Merkataritza Federazioa, Oreka IT, Electra Vitoria eta Laneki). Praktika honek erakusten du denon inplikazioa behar dela lan mundua euskalduntzeko ezinbestekoak diren  neurriak erabaki eta eraginkortasunez aplikatzeko. Arabako alor sozioekonomikoan euskararen presentzia txertatzeko eta handitzeko helburu partekatuarekin ari gara  denok lanean. Elkarri aitortuz bakoitzak duen garrantzia, elkar babesten, elkar argituz.

Pasa den astean, Donostia 2016 Europako Kultur Hiriburutzaren barruan, “Hitzargiak –  Elkar argitzen duten hizkuntzak” izeneko egitasmoaren topaketak burutu ziren eta  bertan, Lanabesekin batera, Ziurtagiriaren Elkartearen beste bi proiektu aurkeztu ziren, Europako adituen aurrean, jardunbide eredugarri gisa: Bai Euskarari Ziurtagiria eta  Enpresarean. Jardunbide horiek berritzaileak, egokiak, arrakastatsuak edota  eredugarriak dira, bai gure komunitatearentzat, baita beste hizkuntza- edota hiztun-  komunitate hainbatentzat ere. Jardunbide egokiak ezagutzeak eta baliatzeak ondorio  biderkatzaileak izan ditzake: esperientziak partekatzeak, besteengandik ikasteak, elkar  elikatzeak eta laguntzeak ekimenen arrakasta indartu dezake, eta, eraginkortasuna  sendotu. Elkarrekiko aitortza, egindakoa balioestea, urte hauetako lorpenak babestea  eta ekarpena etorkizunerako baliatzea. Urte hauetan zerbait ikasiko genuen, ezta? 

Esperientziak partekatzeak, besteengandik ikasteak, elkar  elikatzeak eta laguntzeak ekimenen arrakasta indartu dezake

Ibilbide arrakastatsu eta eredugarria dute, zalantzarik gabe, aurten Bai Euskarari  Sariak jasoko dituztenek. Euskaraz lan egin eta euskaraz bizi daitekeela erakusten  digute aurtengo saridunek. Gure etorkizuna euskaraz pentsatu eta eraiki behar da...  Euskaraz bizitzea, euskaraz lan egitea, ekitea, sortzea, berritzea, saltzea eta erostea,  egunerokotasunean euskaraz normaltasun osoz aritzea posible bada, gure ongizatea  handiagoa izango baita. Horra hor gure erronka. Lan handia dugu egiteko, baina ereduak  ditugu. Gure komunitatearen ongizatean eragingo dugu esperientziak elkartrukatuz eta elkarrekin lan eginez. Azken batean, elkar argituz.