Aner Garmendia: "Nazioartekotzea, berrikuntza eta pertsonak dira EGA Master ereduaren zutabe nagusiak"

"Lanean euskara erabiltzeko aukera ematen duten enpresak erakargarriagoak dira aukera hori ematen ez dutenak baino. Horrek azken finean lehiakorrago izatea esan nahi du"

"Ametsetan bakarrik dabilena, ametsetan baino ez dabil" esaldia askotan errepikatzen omen du Iñaki Garmendiak, EGA Master enpresaren sortzaileak. Proiektu arrakastatsu orok amets sendo bat du oinarri, akziora eramandako ideia-sorta amestua. Eta Iñaki Garmendiak hori egin zuen 1990ean. Gaur egun 150 herrialdetan saltzen ditu esku-tresnak. EGA Master kasuaren metodoa unibertsitateetara hedatu daiteke eta bere seme Aner eta Iñakik aitaren lekukoa berme osoz hartu dute. Enpresa lehiakorra, konprometitua, berrikuntzan eta pertsonetan oinarritutakoa eta euskalduna da EGA Master. Hobeto ezagutzeko BAI aldizkaria Aner Garmendiarekin egon da.

Ezer baino lehen, Aner, zer eskaintzen dio euskarak zuen ezaugarrietako erakunde bati?
Merkatura begira jarriz gero, esan daiteke euskarak ez duela garrantzirik gurean, izan ere Euskadin  soilik %1 saltzen dugu. Gure eguneroko merkatu hizkuntza ingelesa da, baina horrek ez du esan nahi guretzat euskara inportantea ez denik. Barrura begira euskarak konpromisoa eragiten du, taldearen kohesioa, proiektu baten nortasuna eta horri esker ere lortzen da arrakasta.

Esaterako, zuen kontratazio politikan euskara garrantzitsua da.
Zuzendari komertzial berri bat kontratatu dugu, bere bizitza guztian Hong Kong, Korea eta Londresen lanean ibilitakoa, nazioarteko sekulako esperientziarekin. Eta guretzat baino, berarentzat oso garrantzitsua izan da gure enpresa euskalduna izatea, eta gurean euskal giroa nagusi izatea. Era berean, esango nuke gasteiztar euskaldun batentzat ere motibagarria dela EGA Masterren lan egitea. Eta hori oso garrantzitsua da. Lanean euskara erabiltzeko aukera ematen duten enpresak erakargarriagoak dira aukera hori ematen ez dutenak baino. Horrek azken finean lehiakorrago izatea esan nahi du.

Bai Euskarari ziurtagiria ere baduzue, eta nolabait hizkuntzaren erabilera sustatzen duzue.
Euskal hiztunen arteko batzar bat baldin badago, beti izaten da euskaraz, naturaltasun osoz gainera. Euskarak gurean balio handia du eta horren haritik euskara ikastaroak eskaintzen dizkiegu gure langileei eta oro har sekulako arrakasta dute.

Enpresarean ekimenean ere parte hartu duzu aurten, EGA Master metodoaren bilakaeraren berri emanez.
Gaur egun 106 langile gara, eta horietatik 80 Gasteizen dihardugu, beraz gure hizkuntzara eta gure enpresa sarera lotuta gaude. Hori esanda, aipatu nahiko nuke enpresa eta euskararen arteko loturak ez direla normalenak izaten, gaur egun ingelesa delako nagusi gure arloan, baina uste dut Enpresarean moduko ekimenak oso interesgarriak direla.

Hitz egin dezagun EGA Masterren arrakastaz. Zein da giltza?
EGA master kasuaren metodoaren liburua Madrilen aurkeztu berri dugu. Gure ereduaren hiru oinarriak nazioartekotzea, berrikuntza eta pertsonak dira. Horiexek dira gure proiektuaren zutabe nagusiak. Nazioartekotzea jaio ginenetik. Nire aitak Eibarko Armagintza Eskolan teknikari komertzial izan nahi zuela esaten zuenetik. Gu hasieratik ohitu ginen ekosistema ezezagun eta berrietan lan egitera, gure lurraldetik hurruti bidea egitera. Gaur egun 150 herrialdetan saltzen dugu, mundu guztian antenak ditugu eta gure produktuen erabiltzaileek egunero informazioa bidaltzen digute.

Berrikuntza arloari ere errekurtso ugari eskaintzen dizkiogu. Munduan ehunka erreminta ekoizle  daude eta horietako asko oso merke ekoizten den tokietan daude kokatuta. Konpetentzia horren aurrean zer eskaintzen dugu guk? Nolabait bezeroei balio erantsi bat eman beharra dago, konpetentziagatik bereiztuko gaituena. Gure produktuek segurtasun gehiago eskaintzen dute, eta langileek askoz seguruago egiten dute lan gure esku-tresnekin. Era berean, Ega Masterteko tresnak eraginkorragoak dira.  

Hirugarren zutabe garrantzitsua pertsonak direla aipatu duzu.
Gazteak, motibatuak eta sekulako konpromisoarekin. Hiru ezaugarri horiek dituzte gure erakundeko pertsonek. Bi urtean behin 50 galderatik gorako inkesta egiten dugu. Eta gure langileek gehien baloratzen dutena da formazioa (ikasteko aukera eskaintzen diegu), elkarlanerako giroa ere asko baloratzen dute eta gainera langileak baloratuak sentitzen dira. Garrantzitsua da lan-taldea eta zuzendaritzatik langileen ideiak aintzat hartzen ditugu. Nazioartekotzea, berrikuntza eta pertsonak, hirurak dira faktore garrantzitsuak: pertsonarik gabe ez baitago ekoizpenik ezta enpresa liderrik ere.

Eta merkatua norantz joango da etorkizunean?
Asia, Ekialde Hurbila, Hegoamerika eta oso nabarmen Afrika. Datorren hamarrekoan hazkunde handiena izango duten hamar lurraldeetatik zortzi Afrikan daude. Afrikan klase ertaina hazten ari da eta guk itxaropen handia dugu bertan. Gure salmenten dagoeneko Afrikan egiten ditugu. Kongo, Etiopia, Ghana, Nigeria... asko saltzen dugu herrialde horietan. Gasa, minerala... industria handia dagoen tokietan. Baina baita lehengai industriarik ez dagoen lurraldeetan ere.