Ziurtagiria hedatzeko Urrats Biziak Lizarran

2013-03-05
arkaitz

Sektore desberdinetako entitateak hurbildu ziren atzo iluntzean Lizarrako Maria Vicuña eraikinean antolatu genuen bilera informatibora. Bai Euskarari Ziurtagiria eta Ziurtagiriaren Elkartearen lana bertako komertzio, enpresa eta mota ezberdinetako elkarteetara iristaraztea izan zen atzoko aurkezpenaren helburu nagusia.

Bilera informatiboa abiapuntu hartuta, hurrengo urratsa egitasmoa udalerrian zabaltzea izango da. Asmo horrekin eta Olga eta Alfredo herritarren ekimenari esker, taldetxo bat eratzea lortu dugu, Ziurtagiria hauspotzen laguntzeko. Ondoren, interesa agertu duten entitateekin Bai Euskarari Ziurtagiria eskuratzeko prozedura abian jartzeko epe bat zabalduko dugu. Egun, Lizarrak 14.138 biztanle ditu (2012ko zentsuaren arabera). Herritarren % 15ak euskaraz hitz egiten du, eta beste hainbestek, ulertu. Kopuru horri gehitu beharko genieke, asteburuak, zubiak eta udako zein Aste Santuko opor garaian Lizarran denbora tarte luzeak egiten dituzten bisitari eta erromes euskaldunak. Jada, herriko 7 komertziok eskuratua dute Bai Euskarari Ziurtagiria, eta Nafarroan, denera, 330 entitate dira ziurtagiridunak.

Izan zaitez Bai Euskarari Laguna

Zure babes ekonomikoa ezinbestekoa zaigu hau bezalako proiektuak lantzen segitzeko eta zuei eskaintzeko.

Bai Euskarari Elkartea lan munduan euskararen erabilera areagotzeko eragiten ari da, Euskal Herri osoan. Bai Euskarari Ziurtagiriarekin hasi genuen ibilbidea eta euskaraz eroso aritzeko proiektuak ari gara denon eskura jartzen: Lansarean lan-ataria, Enpresarean, Euskaragileak, Elkarrengandik Ikasiz solasaldiak, etab.

Bai Euskarari ziurtagiria duten komunitateko entitateen ekarpenari esker, batez ere, bideragarria da gure proiektua. Zuk ere babestu dezakezu gure proiektua Bai Euskarari Laguna eginez.

Gainera, Bai Euskarari Elkarteak lehentasunezko mezenasgo jarduera izendapena jaso du Gipuzkoako Foru Aldundiaren aldetik eta, ondorioz, zerga onurak ezarriko zaizkizu egindako ekarpenarengatik (enpresentzako kenkaria, % 18koa; norbanakoentzat. % 30ekoa).

Izan zaitez Bai Euskarari Laguna