Bigarren hizkuntzaren garapena lantokian: Europar ikuspegiak “Second Language Development in the Workplace: European Perspectives“

Azken hamar urteotan lan munduan gertatu diren aldaketek, lantokiko komunikazio-beharretan eta hizkuntza gaitasunean eragin al dute? Europako Kontseiluak sustatutako proiektuen bitartez, gai hori aztertzen eta lantzen ari da aspalditik Matilde Grünhage-Monetti–  lantokiko trebakuntzan –Workplace Learning- aditua den alemaniar-italiarra. Horrela bada, lanean ari diren pertsonei, bereziki migratzaileei, aukera-berdintasuna bermatzen zaie hizkuntza-gaitasunaren hobekuntzaren bidez. Era berean, komunikazio-hobekuntzaren bitartez, enpresaren edo instituzioaren emaitzak hobetzea ahalbidetzen da. Horrenbestez, proiektu honen berrikuntza nagusietako bat da lanaren bitartez lantokian bertan ikasi ahal izatea, pertsonen gaitasuna eta benetako beharrak abiapuntutzat hartuz. Datorren urtarrilaren 24an, Matilde Grünhage-Monettiren esperientziak eta metodologia ezagutzeko aukera izango dugu, Banaiz Bagara Elkarteak eta Nazaret Zentroak Donostian (Kutxazabalen) antolatutako mintegian. Bertan, dinamika parte-hartzaile baten bitartez tresna horiek gure egoerara nola egokitu ditzakegun aztertu ahal izango dugu. Odysseus eta Language for Work Europako Kontseiluak sustatutako Odysseus eta Language for Work proiektuak duela 15 urte jaio ziren, lantokian bigarren hizkuntza bat erabili behar duten langileen gaitasunak hobetzeko. Lan-ibilbidean zehar langileek lantokian -enpresetan zein erakundeetan- beraien potentzial osoa erabili ahal izateko, hizkuntza-gaitasuna oztopo bihurtu gabe. Proiektuen bilakaeran laster ikusi zen, lantokietan eta lan-prozesuetan gertatzen diren aldaketa post-fordistek gero eta komunikazio gaitasun handiagoa eskatzen diotela langile guztiei, ez bakarrik migratzaileei edo lantokian bigarren hizkuntza bat hitz egiten dutenei. Lan harremanetan, oro har, komunikazioak gero eta zehatzagoa, dinamikoagoa, emankorragoa edo enpatikoagoa izan behar du lankide, bezero eta arduradunekin. Komunikazio-gaitasunak hizkuntzarekin lotuta daude. Proiektu horiek, hala ere, ez dute hizkuntza ikastea proposatzen, baizik eta komunikazio egoera jakin batzuetarako hizkuntza-gaitasunak bereganatzea. Horren abiapuntua langileak beraiek dira, langileak baitira, laneko komunikazio-beharrak edo hutsuneak hoberen ezagutzen dituztenak. Jakintza horren azterketatik abiatuz, enpresarentzat ere oso interesgarria da, lantokia ikastoki bihurtzea eta langileei behar dituzten hizkuntzen zein komunikazio-tresnen trebakuntza ematea. Ikuspegi hori aintzat harturik, laneko hobekuntza-prozesuak etengabekoak dira, eta horrekin batera komunikazio-prozesuak eta hizkuntza-beharrak. Proiektu honetan parte hartzen duten Europako herrialdeetako errealitateak anitzak izanik – sozio-ekonomiari dagokionez, hizkuntza-egoerari dagokionez, ikasketa-mailari dagokionez, etab. – ezinezkoa da eskema bera errealitate guztietara aplikatzea, baina posiblea da bide berriei ateak zabalduko dizkieten egokitzapen eta elkartruke-prozesuak aztertzea. Gureari begira, lantokietan eta bestelako lan egoeretan lan hizkuntza edo hizkuntzen erabileraren inguruan hausnartzera gonbidatzen gaitu. Euskara Planak dira seguruenik, gurean, enpresa eta erakundeen komunikazio eta hizkuntza egoera gehien lantzen dituzten tresnak. Hala ere, nola barneratu langile migratzaileen hizkuntza-beharrak euskara planetan? Zer behar du langile erdaldun batek, euskaraz funtzionatzen duen enpresa batean sartzeko? Euskaltegia al da beti erantzunik egokiena? Irakaskuntza akademikoaz gain, ba al da behar funtzionalei erantzuna emateko trebakuntzarik? Egokiak al dira Lanbide Heziketako ikasleen komunikazio-gaitasunak lan-merkatuaren eskaeretarako? Lanerako trebakuntzan, hizkuntzak ikasgai bihurtu behar al dira? Nola bihurtu ikastoki lantokia? Ba al da horren inguruko esperientziarik gurean eta Europako gainerako herrialdetan? Gai horietara hurbiltzeko aukera emango digu mintegiko egitarauak:

Ordua	Dinamika	Gaia	Azalpena
9:00-9:20	Aurkezpena	Bigarren hizkuntza lantokian	Abiapuntua eta mintegiaren helburuak
9:20-10:00	Talde-lana + debatea plenarioan	Elkar ezagutu. Bakoitzaren lantokiaren / lanaren komunikazio egoerak identifikatu	Parte-hartzaileen espektatibak eta beharrak ezagutu
10:00-10:40	Talde-lana	„New work order“ / aldaketa estrukturalak ekonomian eta lan harremanetan; interdependentzia komunikazio behar berriekin	Nola aldatu da  lan egoera azken 10 urteotan? Zein behar berri sortzen dituzte aldaketa hauek gurean, lanbide eta eginbehar zehatzetan?
10:40- 11:00	KAFEA, ATSEDENA
11:00 – 11:30	Aurkezpena, talde-lana	Aldaketa estrukturalak eta komunikazio beharren aldaketak, emaitzak
11:30-13:00	Talde-lana + debatea plenarioan	Lantokia = ikastokia: pertsona. Ikasle/langilearen ikuspegia: hizkuntza praktika sozial gisan, hizkuntza = kolektibitate sortzailea lantokian, hizkuntzaren balio inklusiboa	Hausnarketa, „Illeris“ ikaste sozialaren teoriaren inguruan. Nola ikasten dugu? Ikastaroetan edo praktikan?
13:00-14:00	Talde-lana + debatea plenarioan	Lantokia = ikastokia: gunea. Erakundetzea, antolamendua eta baliabideak	Antolamendu eta baliabideen aldetik, zer behar da, erantzun egokia emateko? Aukerak eta zailtasunak?
14:00- 14:30	Plenarioa	Emaitzak eta bukaera

Norentzat da? ·        Euskaraz (ere) lan egiten duten enpresa, negozio edo erakundeetako ordezkarientzat. ·        Euskara-teknikari eta irakasleentzat. Lanbide Heziketako irakasle edo teknikarientzat. ·        Migrazio teknikarientzat. ·        Hizkuntza sailetako ordezkarientzat. ·        Interesa duen edozeinentzat. Hizkuntza ·        Euskara eta ingelesa (izena emateko unean adierazi beharko da ingelesetik euskarara interpretazioa behar den). Prezioa ·        Doan. ·        Aurretik izena eman behar da. Izena emateko: ·        Telefonoz: Kutxazabal Zentroa + 34 943 404560 ·        E-postaz: kutxazabalzentroa@kutxafundazioa.es ·        Adierazi mesedez zure izena, abizena, lantokia eta kargua. Lekua: Kutxazabal Zentroa Moneda Baserria. Serapio Mujika, 10 20016 Donostia