Azken 30 urteotako Hizkuntza Politikaz

Hala Bedi Irratiak 30 urte betetzen dituela eta, mahai-ingurua antolatu zen Gasteizko Ignacio Aldecoa Kultur Etxean, maitzaren 22an. Bertara gonbidatuek [Patxi Baztarrika (Eusko Jaurlaritzako Hizkuntza Politikarako Sailburuordea), Zigor Etxeburua (Gipuzkoako Foru Aldundiko Euskara Zuzendaria), Jon Sarasua (MUko irakaslea) eta Ramon Etxezarreta (Eusko Jaurlaritzako Hizkuntza Politikarako Sailburuorde ohia)] euren iritziak plazaratu zituzten. Jarraian mahai-inguruko pasarte interesgarrienak irakurgai. Patxi Baztarrika: Hizkuntza biziberritzea zeharo konplexua da, baina izan badira horretarako gakoak: gizarte eta erakundeen borondatea, erakundeen eskuhartzea, herritarrak bat etortzea eta gizartearen eta politikaren kontsentsua. Jon Sarasua: Hizkuntza-minorizazio eta biziberritze egoeraren aurrean kezka eta diagnostiko kritikoa, eta, balorazio positiboa, berriz, ezinbesteko hiru motore izan direlako: erakundeak, gizartearen euskalgintza sarea, eta milaka pertsonaren indar bilketa intimoa. Ramon Etxezarreta: egungo egoeraren parekorik ez da inoiz izan, egiteko asko dagoen arren. Horregatik, datozen 30 urteetako hizkuntza-politikaren ildoak egin litezke, beldurrik gabe eta lotsarik gabe. Aitzitik, euskara intentsitate askotara senti daitekeela jabetu behar gara. Zigor Etxeburua: Baloratu beharrekoa lehenbizi giza-ekimenetatik eta norbanakoengandik egin den bultza-indarra da, izan ere, erakundeek egin baldin badute herriak tinko eta irmo behin eta berriro horrela eskatu duelako izan baita, erakundeak herritarren zerbitzurako daudela ez baita gogoratu behar.