Kontratazio publikoetako hizkuntza baldintzen inguruko xehetasunen berri eman du Gipuzkoako Foru Aldundiak

Udal<>ekin egitasmoaren jarraipen batzordeak deituta, alor sozioekonomikoa euskalduntzen lan egiten dugun eragileok lehen eskutik jaso genuen asteartean Gipuzkoako 39 Udalek eta Gipuzkoako Foru Aldundiak adostutako kontratazio publikoetako hizkuntza baldintzen araudiaren nondik norakoa. Urtarrilean Gipuzkoako 37 udalek, Urola Kostako Mankomunitateak, Udalerri Euskaldunen Mankomunitateak eta Gipuzkoako Foru Aldundiak kontratazioetarako hizkuntza irizpideak modu bateratuan aplikatzea adostu zuten. Gerora, beste Udalerriren batzuk bat egin dute egitasmoarekin eta datozen egunetan gehiago izatea aurreikusten dute. Hizkuntza baldintza horiek Udalen kontratazio politikan tresna garrantzitsuak izango direnez, zuzeneko informazioa jaso genuen atzokoan alor sozioekonomikoa euskalduntzen ari garen eragileok. Bertan izan ginen Kontseiluko, EMUNeko, AHIZE-AEKko eta Ziurtagiriaren Elkarteko ordezkariak. Modu horretan, hizkuntza normalizatzen lagunduko duten konplizitateak sortzea espero duela jakinarazi zigun  Gipuzkoako Foru Aldundiko Euskara zuzendari Zigor Etxeburuak. Egitasmoaren arduradunek adierazi zutenez, kontratazio publikoetan prestazio emaile izango diren enpresek administrazioarekin eta herritarrekin izan beharreko harremana arautu da eta modu bateratuan aplikatuko da aurrerantzean. Adostutako hizkuntza baldintzak indarrean dagoen Euskararen Legea jarraituz ezarri direla eta Zerbitzu Juridikoen onespena duela ere azpimarratu zuten. Are gehiago, Jaurlaritzaren oinarri juridikoak betetzen diren heinean Araba eta Bizkaiara hedatu daitekeen egitasmoa dela baieztatu zuten. Azpimarragarria ere egitasmoan parte hartzen duten Administrazioek kontratatutako enpresek, eskatutako hizkuntza baldintzak betetzen dituztela egiaztatu beharko dutela, izan ere, hizkuntza baldintzak ez betetzea arrazoi nahikoa izan daiteke kontratua eteteko. Horrekin lotuta, hiru bide irekitzen dira enpresek hizkuntza baldintzak betetzen dituztela bermatzeko: a) Enpresak aurkeztutako agirien bidez b) Kanpo erakunde batek kreditatuta d) Administrazioak berak azterketa probak eginda Hurrengo urratsa bihar bertan emango dute eta Gipuzkoako enpresen elkarteei azalduko dizkiete hizkuntza baldintza berriei buruzko xehetasunak . Bilera horretan ere aliantzak sortzea espero dute Aldundiko eta Udaletako arduradunek eta hizkuntza baldintzak zuzenean ezagutzeaz gain, hartutako erabakiak negozio alorrean ekarriko dizkien aukerez ere hitz egingo dute.