Bai Euskarari Elkarteak Harrobi diploma kudeatu du

Bikain sistemaren barruan, Harrobi diploma abian jarri du Eusko Jaurlaritzaren Hizkuntza Politikarako Sailburuordetzak, eta atzo banatu zituzten Bilbon egindako aitortza ekitaldian. Bai Euskarari Elkartea arduratu da diploma berriaren kudeaketaz. Lan munduan euskararen erabilera areagotzeko eragitea da Bai Euskarari Elkartearen xedea eta helburu horri begirako urratsa da elkarlan hau. 

Harrobiren sorrera-prozesuan parte hartu du Bai Euskarari Elkarteak eta ziurtagiria lortzeko metodologian eta irizpideetan gure iritzi eta gomendioak ematea ahalbidetu digu. Izan ere, Bai Euskarari Elkartea aitzindaria da euskararen zertifikazioan eta urte hauetan guztietan metodologian egin den lanketaren aitortza da. 

Eusko Jaurlaritzako Hizkuntza Politikarako sailburuordetzak (HPS) Bai Euskarari Elkarteari proposatu dio Harrobi diploma kudeatzeko homologatzea. 2022an zehar hainbat lan tekniko egin dira proiektu honen barruan, eta 2023an zehar diplomaren pilotajea burutu da 20 entitatetan. Horretarako, besteak beste, zehaztu da nori zuzendu behar zaion, zer-nolako ezaugarriak izan behar dituen, bete beharreko gutxienekoak, nola erakarri entitateak aitortza honetara, nola lagundu ahal zaien, nola komeni den beraiekin kontraste lan horiek egitea, zer nolako euskarriak eta bitartekoak beharko diren ebaluazio- edo kontraste-bilera horiek egiteko, eta abar. Hori guztia jaso da lanketa honen oinarrian. Ikasitakoak kontuan hartuta, hobekuntzak barneratuko dira 2024an.

2023an, entitate hauek jaso dute Harrobi diploma:

• Azurmendi Enea

• Fundación Lantegi Batuak

• Eragintza Fundazioa

• Tazebaez, S.Coop.

• Bruss Juntas Técnicas SL

• Argia Fundazioa

• Bizkaiko Kirol Federakundeen Elkartea

• Bastida Akademia

• Ondoan S.Coop. (Zamudio, Arrasate, Gasteiz eta Donostia)

• Ekolur Ingurugiro Aholkularitza

• Katea Legaia

• Kastore Gest

• El Corte Inglés (Gasteiz eta Bilbo)

• Santurtziko San Joan Jainkoarena Ospitalea

• Alet Taldea

• Behingoz

• Belmek

Zer da Harrobi?

Eusko Jaurlaritzaren arabera, “euskararen kudeaketan lehen pausoak ematen dituzten entitate pribatuen artean euskararen erabileraren sustapena egiteko konpromisoa hartzen dutenei emango zaie Harrobi”. Euskal Autonomia Erkidegoko entitateei zuzenduta dagoen diploma da eta hiru urterako emango da, irizpide batzuk bete ostean. Epealdi hori amaitzean, entitateak erabaki ahal izango du maila altuagoko ziurtagiri bat eskuratu edo Harrobin beste hiru urtez egon.

Zergatik erabaki du Bai Euskarari Elkarteak lankidetza honetan sartzea?

Bai Euskarari Elkartea aitzindaria da euskararen zertifikazioan, 2000tik ari baita lanean Bai Euskarari ziurtagiriaren bitartez. Ordutik, elkarlanerako saiakera ugari egon dira.

Zalantzarik ez dago Euskal Herri osoan zabalduta dagoen Bai Euskarari Ziurtagiriaren proiektuari eragiten diola euskara maila zertifikatzeko beste ziurtagiri edo diploma baten sorrerak. Dena den, eskema berri horretan lankidetzan aritzearen egokitasuna gailendu da, gure esperientziatik ekarpena egiteko eta ziurtagirien eskema berriak enpresetan euskararen erabilera areagotzea bermatzen laguntzeko. Izan ere, espazio berriak esploratzea gustatzen zaigu, euskararentzat bide berriak irekitzen dituela sinisten dugulako. 

Bai Euskarari Elkarteak argi du bere helburu estrategiko garrantzitsuetako bat dela Euskal Herri osoko euskara ziurtagiri-eskema kudeatzea, eta horri begira arituko da lanean aurrerantzean ere. 

Bai Euskarari Ziurtagiriari buruzko informazioa, hemen.