Hainbat eragilek Enpresarean finkatu behar dela uste du

2013-02-13
Baieuskarari

Bai Euskarari Ziurtagiriaren Elkarteak antolatuta Enpresarean-en etorkizunaz eztabaidatzeko formatu txikiko saio berezia egin zen atzo arratsaldean San Telmo museoan. Eztabaida saioa Badu Bada erakusketaren baitan antolatu da. Hain zuzen, Enpresarean egitasmoak orain arte egin duen ibilbidearen errepasoa egin eta erreferentziazko gonbidatuekin Enpresareanen etorkizunaz, eta euskarazko produktu eta zerbitzuak eskaintzen dituzten enpresen arteko elkarlanaz hitz egin zuten partaideek.

Hasteko, Bai Euskarari Ziurtagiriaren Elkartearen zuzendari Rober Gutiérrezek egitasmoa aurkeztu eta proiektua gaur egun zein egoeratan dagoen azaldu du. Jarraian, lauzpabost laguneko taldetan banatuta ondoko galderei erantzun diete partaideek: 1) Zertan asmatu dugu?, 2) Zertan ez dugu asmatu?, 3) Zer espero duzu aurrera begira?, 4) Zer erantsiko zenioke orain artekoari?

Hausnarketarako tartea emankorra izan zen, horrela egiaztatu zuten partaideek ondorioen tartean. Lehenengo galderari erantzunez, Enpresarean egitasmoa bera abian jartzea nabarmendu zuten eztabaida saiora gerturatutakoek. Gabezien artean, berriz, industria sektoreko enpresa gutxik parte hartu zuela. Etorkizunera begira, egitasmoa “finkatzeko” beharra ikusi zuten, eta horretarako bideak jartzea beharrezkotzat jo zuten. Besteak beste, bestelako instituzio eta erakundeekin (Udalak, Eusko Jaurlaritza, Adegi, Confebask, eta abar) hitzarmenak sinatzea ondo legokeela adierazi zuten. Era berean, sareko azoka indartu behar dela ondorioztatu zuten.

Saioaren amaieran, Rober Gutierrez Bai Euskarari Ziurtagiriaren Elkarteko zuzendariak hausnarketa saioa Enpresareanen etorkizuna marrazten joateko “oso baliagarria” izan zela esan zuen, eta jasotako ekarpenak barneratzeko prozesua hasiko dutela aurreratu zuen.

Gerturatu ziren guztiei eskerrak eman ondoren, ekarpen guztiekin txosten bat osatu eta Badu Badako eztabaida saioan parte hartu zuten guztiei txostena bidaltzeko konpromisoa hartu zuen.

Izan zaitez Bai Euskarari Laguna

Zure babes ekonomikoa ezinbestekoa zaigu hau bezalako proiektuak lantzen segitzeko eta zuei eskaintzeko.

Bai Euskarari Elkartea lan munduan euskararen erabilera areagotzeko eragiten ari da, Euskal Herri osoan. Bai Euskarari Ziurtagiriarekin hasi genuen ibilbidea eta euskaraz eroso aritzeko proiektuak ari gara denon eskura jartzen: Lansarean lan-ataria, Enpresarean, Euskaragileak, Elkarrengandik Ikasiz solasaldiak, etab.

Bai Euskarari ziurtagiria duten komunitateko entitateen ekarpenari esker, batez ere, bideragarria da gure proiektua. Zuk ere babestu dezakezu gure proiektua Bai Euskarari Laguna eginez.

Gainera, Bai Euskarari Elkarteak lehentasunezko mezenasgo jarduera izendapena jaso du Gipuzkoako Foru Aldundiaren aldetik eta, ondorioz, zerga onurak ezarriko zaizkizu egindako ekarpenarengatik (enpresentzako kenkaria, % 18koa; norbanakoentzat. % 30ekoa).

Izan zaitez Bai Euskarari Laguna