Gasteizko Udalak % 50ean finantzatuko du Bai Euskarari Ziurtagiria

Gasteizko Udalak merkataritza arloan euskararen presentzia sustatzeko diru-laguntzak emateko udal programaren deialdia egin du. Bertan adierazten denez, Udalak establezimenduaren hizkuntza egoeraren diagnostikoarekin, ebaluazioarekin edo zertifikazioarekin loturako gastuak diruz lagunduko ditu.

Hortaz, Bai Euskarari Ziurtagiria eskuratzen duten Gasteizko establezimenduek kostuaren % 50 arteko diru-laguntza jasoko dute; laguntza, beti ere, 300 euro artekoa izango da gehienez. Bai Euskarari Ziurtagiria eskuratzeko jarraibideak bideo honetan ikus ditzakezu.

Diru-laguntzak eskatzeko epea 2013ko irailaren 3an bukatuko da, eta onuradunek, besteak beste, betekizun hauek bete beharko dituzte:

1. 50 langile baino gehiago ez izatea.
2. Urteko negozio-bolumenak edo balantzeak 10 milioi euro ez gainditzea.
3. Merkataritza-jarduera txikizkako salerosketa edo ostalaritza izatea.
4. Ekonomi jarduera Gasteizko udalerrian kokatutako lokal batean garatzea.
5. Administrazio publikoen aurreko zerga-betebeharrak egunean edukitzea, baita Gizarte Segurantzarekiko betebeharrak ere.

Era berean, Gasteizko Udalak diruz lagunduko ditu merkataritza establezimenduen kanpo errotuluak euskaratzeko lanak eta web orrien itzulpenak, euskaraz eta gaztelaniaz egon daitezen.

Deialdiaren testu osoa hemen irakur daiteke.