Zure webgunea ere '.EUS' izan daiteke

Bai Euskarari Ziurtagiriaren Elkarteak ‘.EUS’ Interneteko Domeinuaren Aitzindari izateko erabakia hartu zuen beste 91 erakunderekin batera. Hori horrela www.baieuskarari.eus da Bai Euskarari Ziurtagiriaren elkartearen webgunearen helbide berria. Zure webgunea ere ‘.EUS’ izan daiteke.

‘.EUS’ Interneteko domeinua, Euskara eta Euskal Kulturaren Komunitatearen Interneteko lehen mailako domeinua da. Bere helburua euskara eta euskal kultura sustatu eta Euskara eta Euskal Kulturaren Komunitatea kohesionatzea da. .eus, hortaz, tresna bat da, euskara beste hizkuntzen mailan kokatzen duena, euskararen normalizazioan lagunduko duena eta euskararen herriari nazioarteko aitortza eskaintzen diona.

Orain, ‘.eus’ domeinua abiarazte-aldian dago. Fase hau, batez ere, elkarte, enpresa eta  instituzio publikoen domeinu- izenei bideratua dago. Domeinu-izenak eskatzeko eta babesteko balioko du. Abiarazte-aldia azaroaren 18an bukatuko da eta egun hortatik aurrera edonork eskatu ahal izango du edozein domeinu-izen. Baita zure elkarte edo enpresari zegokiona ere.  

Zergatik eskatu

• Identitatea adierazten du, komunitate baten domeinua da
• Merkatura eta bezerora gerturatzen zaitu
• '.com' bezalako gTLD tradizional eta orokorren saturazioa dago
• Bilatzaileen arau berrietara moldatu eta identifikazioan lagungarria izango da
• Marka babestu eta urratua izatea saihestu dezakezu

Nola eskuratu

Domeinu-izenak gure erakundearen webgunearen ohiko Interneteko edo informatika-zerbitzuko hornitzailearen bitartez eskatzen dira (.com edo beste edozein domeinu erregistratuta dugun hornitzaile berarekin) edo www.domeinuak.eus webgunean argitaratutako erregistradoreen bitartez.