Bai Euskarari, Enpresarean eta Lansarean #eusgara

Erregistro publikora ireki dute '.eus' domeinu-izendapena

2014-12-04
Bai Euskarari

Haziz doa '.eus' komunitatea eta atzo geroztik (abenduak 3), beste 1.192 webgunek dute euskal komunitatearen izendapen digitala. Hori ospatzeko ekitaldia egin zuten Bilbon eta, horrekin batera iragarri, fase irekian aurkitzen dela jada erregistroa. Horrek esan nahi du edonork eska dezakeela erregistratzaile orokorretan bere webgunerako '.eus' domeinu-izendapena. Durangoko Azoka datorrela-eta, eskaintza berezia egingo dute, gainera, norbanakoentzat.

Ziurtagiriaren Elkarteko proiektuen webgune guztiak ere dagoeneko '.eus' dira. Baieuskarari.eus izan zen aitzindarietako bat eta dagoeneko martxan daude Enpresarean.eus eta Lansarean.eus ere.

Bilboko ekitaldian PuntuEus Fundazioko lehendakari, Josu Waliñok azpimarratu zuen "PuntuEus domeinua euskara eta euskal kulturaren komunitatea" dela, "guztiona". Datuak ere eskuratu zituen eta azaldu erregistratutako webguneen %95 Euskal Herrikoak direla eta gainerako %5 mundu osotik jasotako eskaerek bete dutela. Azpimarratu du, oro har, erakunde publiko, enpresa eta era guztietako erakundeetakoak direla komunitatea osatzen duten webguneak.

Fase irekia

Aurrerantzean komunitateko kide izateko baldintzak betetzen dituen edozein webgunerentzat eskatu ahalko da '.eus' domeinu-izendapena. Fase irekia da, erregistro publikoa, eta gainerako '.com' ala '.org' izendapenen kasuan bezala, izena eskuragarri badago, domeinu izendapen hori esleituko dio eskatzaileari dagokion erregistratzaileak.

Durangoko Azokan

Durangoko Azoka datorrela kontuan izanik, eskaintza berezia egingo dute Fundaziokoek. Hala, norbanakoei zuzenduta, Zureizena.eus ekimena jarriko dute abian. Norbanakoek euren izena erregistratu ahalko dute '.eus' izendapenarekin. 30 euroren truke domeinu-izena, 20 posta elektronikoko kontu, 2 GBeko espazioa eta transferentzia ahalmena erosi ahalko dira.

Informazioaren iturria: goiena.eus

Izan zaitez Bai Euskarari Laguna

Zure babes ekonomikoa ezinbestekoa zaigu hau bezalako proiektuak lantzen segitzeko eta zuei eskaintzeko.

Bai Euskarari Elkartea lan munduan euskararen erabilera areagotzeko eragiten ari da, Euskal Herri osoan. Bai Euskarari Ziurtagiriarekin hasi genuen ibilbidea eta euskaraz eroso aritzeko proiektuak ari gara denon eskura jartzen: Lansarean lan-ataria, Enpresarean, Euskaragileak, Elkarrengandik Ikasiz solasaldiak, etab.

Bai Euskarari ziurtagiria duten komunitateko entitateen ekarpenari esker, batez ere, bideragarria da gure proiektua. Zuk ere babestu dezakezu gure proiektua Bai Euskarari Laguna eginez.

Gainera, Bai Euskarari Elkarteak lehentasunezko mezenasgo jarduera izendapena jaso du Gipuzkoako Foru Aldundiaren aldetik eta, ondorioz, zerga onurak ezarriko zaizkizu egindako ekarpenarengatik (enpresentzako kenkaria, % 18koa; norbanakoentzat. % 30ekoa).

Izan zaitez Bai Euskarari Laguna