Barañaingo enpresa eta establezimenduek “Bai Euskarari” 15 urtez

Otsailaren 10ean, ostirala, Barañaingo 36 entitatek Bai Euskarari Ziurtagiria jaso zuten, zerbitzu edo-eta produktuetan euskara sustatzeko lanaren aitorpen gisa. 20:15ean Udaletxeko erabilera askotariko aretoan elkartu ziren Udaletxeko eta Bai Euskarari Ziurtagiriaren Elkarteko ordezkariak euren negozioetan euskara sustatzen eta baliatzen ari diren horiek goraipatu eta zoriontzeko. 15 urte pasa dira Barañaingo Udalak Bai Euskarari elkartearekin lanean hasi zenetik eta, ordutik, geroz eta gehiago dira Nafarroako herriaren bazter euskaldunak. Entitate hauen urte hauetako lan eredugarri eta borondatezko konpromisoari esker urratsak egiten ari gara.

Ekitaldiak aitorpen hitzak, musika, oroigarriak… eta bestelako sorpresak izan zituen, baina, zalantza izpirik gabe, eguneko protagonistak ziurtagiridunak izan ziren, “Bai Euskarari” jarrera hartu duten Barañaingo establezimendu eta enpresak. Aurretik esan bezala, aurten 36 ziurtagiri banatu dira eta, euskara gaitasunaren arabera, maila bat edo beste eskuratu dute. Hiru entitatek ziurtagiriaren maila gorena jaso zuten poz-pozik, “Zerbitua eta Lana Euskaraz” maila, alegia; horrek bermatzen du entitate horiek euskara dutela lan-hizkuntza eta, era berean, euskarazko zerbitzuak eskaintzen dituztela; bestetik, zortzi entitatek “Zerbitzua Euskaraz” maila eskuratu zuten eta, azkenik, 25 “Euskararen Bidean” maila. Lortutako emaitzarekin harro daudela erakutsi zuten guztiek eta aurrera begira euskararen bidean lanean jarraitzeko gogo eta ilusioa aurkeztu zuten. Era berean, Bai Euskarari Ziurtagiriaren Elkartetik, prozesu horretan erraztasunak eta baliabideak eskainiko dizkietela nabarmendu zuten, etengabeko jarraipena egitearekin batera.

Ekitaldia Eider Canales eta Xabi Altzuguren aurkeztu zuten eta Oihane Indakoetxeak, Barañaingo Udaleko alkateak eta Rober Gutiérrezek, Bai Euskarari Elkarteko Zuzendariak hartu zuten hitza aurrean zituzten ziurtagiridunei aurrez aurre zoriondu eta aurrera begira euskaraz lan eta bizitzeko pausoak ematera animatzeko.

Zorionak 36 Ziurtagiridunei

Ziurtagiridun hauek, bakoitza bere tamainan, euskararen sustapenerako neurriak hartzen dituzte; frogatu eta sinisten dute euskarak txertatzeak dakarren onurak eta balio erantsia. Honakoak dira Barañaingo Bai Euskarari ziurtagiridunak:

ZERBITZUA ETA LANA EUSKARAZ

ZERBITZUA EUSKARAZ

EUSKARAREN BIDEAN