Bai Euskarari Sariak urriaren 6an banatuko dira

2017-09-13

Arlo sozioekonomikoan euskararen alde egin duten pertsona bat eta bi entitate aitortuko dira

Bai Euskarari Elkartearen 10.urteurrena ospatuko da

Bai Euskarari Elkartearen 10. urtemuga da aurten eta urriaren 6an, Bai Euskarari Sariak ekitaldiarekin eta mokadutxo batekin ospatuko du Donostiako Tabakaleran. Ekitaldian izen emateko interesa duenak galdetegi honen bidez egin dezake: https://goo.gl/forms/C59mzYOSe0eEhRjF2

Jardunaldia eguerdiko 14:00etan hasiko da, ostiralean, eta enpresa zein pertsona ezberdinekin elkartu eta eztabaidatzeko aukera egongo da. Egun berezia izango da, alde batetik, saridunak izendatu eta aitorpena egingo delako eta, bestetik, Bai Euskarari Elkartearen 10 urteak ospatuko direlako, bide honetan guztian gurutzatu diren lagunekin eta aurrerapausoak ematen jarraitzen laguntzen dutenekin.

Irailaren 15ean itxiko da saridunak proposatzeko aukera (esteka honen bidez egin daiteke: https://goo.gl/forms/XnFM6MVwp06uM2uj1) eta, ondoren, Bai Euskarari Elkarteak izendaturiko epaimahai batek hautatuko ditu Bai Euskarari Sariak 2017 edizioko irabazleak. Urriaren 6an jakingo dugu zeintzuk diren hiru saridunak (Bai Euskarari Saria (2) eta Bai Euskarari Laguna saria).

Elkartetik dei egiten dute ekitaldira izena eman, gerturatu eta euskararen alde egindako ibilbidea aitortu zein arlo ezberdinetako pertsonekin iritziak partekatu eta eztabaidatzeko.

Bukatzeko, nabarmendu Donostiako Udalak ekitaldi hau babesten duela.

Bai Euskarari Sariei buruz

Alor sozioekonomikoan euskalduntzean eragitea da Bai Euskarari Elkartearen helburua eta sari hauen bidez arlo horretan euskara sustatzeko eragin duten entitateak eta pertsonak saritu eta eredu bihurtu nahi dira.

Saridunak, urtez urte:

2009: JEZ (Laudio), IMH Institutua (Elgoibar) eta Kirmen Uribe.
2011: Refractarios Kelsen (Aduna), Hirukide ikastetxea (Tolosa), Sokoa (Hendaia) eta Xabier Mendiguren Bereziartu.
2012: Skunk Funk, Arlan (Erandio) eta Jose Anjel Iribar (Athletic).
2013: VUSA eraikuntzak (Galdakao), Leitzako, Aresoko, Goizuetako eta Aranoko ziurtagiridunak, Anaje Narbaiza (Elay).
2014: Banaiz Bagara, Mendia Optika (Gasteiz) eta Kike Amonarriz.
2015: Euskal Herria Esnea, Nekatur eta Gaizka Garitano.
2016: Sorginen Museoa eta Lezea (Zugarramurdi), Laneki eta Mikel Lezamiz.

Izan zaitez Bai Euskarari Laguna

Zure babes ekonomikoa ezinbestekoa zaigu hau bezalako proiektuak lantzen segitzeko eta zuei eskaintzeko.

Bai Euskarari Elkartea lan munduan euskararen erabilera areagotzeko eragiten ari da, Euskal Herri osoan. Bai Euskarari Ziurtagiriarekin hasi genuen ibilbidea eta euskaraz eroso aritzeko proiektuak ari gara denon eskura jartzen: Lansarean lan-ataria, Enpresarean, Euskaragileak, Elkarrengandik Ikasiz solasaldiak, etab.

Bai Euskarari ziurtagiria duten komunitateko entitateen ekarpenari esker, batez ere, bideragarria da gure proiektua. Zuk ere babestu dezakezu gure proiektua Bai Euskarari Laguna eginez.

Gainera, Bai Euskarari Elkarteak lehentasunezko mezenasgo jarduera izendapena jaso du Gipuzkoako Foru Aldundiaren aldetik eta, ondorioz, zerga onurak ezarriko zaizkizu egindako ekarpenarengatik (enpresentzako kenkaria, % 18koa; norbanakoentzat. % 30ekoa).

Izan zaitez Bai Euskarari Laguna