Enpresarean Foroa: "Industria 4.0. Zertaz ari gara?"

2017-10-30

Alexander Arriola (SPRIko zuzendari nagusia). Azaroak 21. Gipuzkoako Parke Zientifiko eta Teknologikoan

Gizartean eta enpresa munduan horrenbeste entzuten ari garen Industria 4.0 gaiari buruz arituko da Alexander Arriola, SPRIko zuzendari nagusia, azaroaren 21ean, Bai Euskarari Elkarteak antolaturiko Enpresarean Foroan.

Hitzaldia Gipuzkoako Parke Zientifiko eta Teknologikoan izango da, 9:00etatik 11:00etara; parte-hartzaileak eztabaida eta iritziak partekatzeko gosari batean elkartzeko aukera izango dute.

Sei bat urte pasa dira Industria 4.0 kontzeptua munduan estreinakoz erabili zenetik eta Alemanian izan zen. Ordutik hona, mundu osora zabaldu den kontzeptu honek hainbat deskribapen berenganatu ditu: laugarren industria-iraultza, fabrikazio aurreratua, industria adimenduna edota ziber-industria, besteak beste. EAEk bere estrategia propioa garatu du industria-iraultza berri honi heldu eta aurrera egiteko: Basque Industry 4.0.

Zer da industria 4.0? Eta Big data? Industria adimenduna? Edota Zibersegurtasuna? Nolako eragina izan dute gure eguneroko jardunean? Nola moldatu gara paradigma berri honetara? Zein da (bertako) hizkuntzen lekua 4.0 Industrian? Enpresa-garapenerako euskal agentziaren ikuspuntutik galdera hauei erantzuna ematen saiatuko da SPRIko zuzendari nagusia.

Azaroaren 21ean azalduko dizkigu industriako kontzeptu berritzailearen nondik-norakoak eta aurrera begira kontutan hartzeko giltzarriak.

Izena emateko

Plazak mugatuak dira eta interesatuek galdetegi hau betez eman dezakete izena, doan.

https://goo.gl/forms/FgXw2zWXPzFHV6WA2

Enpresarean Foroa

Bai Euskarari Elkartearen Enpresarean proiektuaren zati bat da FOROA. Enpresen eta profesionalen arteko hausnarketa eta elkarrekintzarako gune bat da. Enpresarean FOROaren formula da aditu bat(zu)en eskutik (gosari-)hitzaldi bat eskaintzea, ideiak eta hausnarketak partekatzen lagunduko duena, eta ondoren elkarlana bideratzeko topagunea. Enpresarean FOROen bidez, enpresen eta profesionalen arteko harremanen maiztasuna handitu eta eremu geografikoa zabaldu nahi dugu, Euskal Herri osoan egoteko eta, topaketa izateaz gain, enpresa ikuspuntutik zerbait ikasteko aukera ere eskaini nahi dugu. [Info + www.enpresarean.eus]

Izan zaitez Bai Euskarari Laguna

Zure babes ekonomikoa ezinbestekoa zaigu hau bezalako proiektuak lantzen segitzeko eta zuei eskaintzeko.

Bai Euskarari Elkartea lan munduan euskararen erabilera areagotzeko eragiten ari da, Euskal Herri osoan. Bai Euskarari Ziurtagiriarekin hasi genuen ibilbidea eta euskaraz eroso aritzeko proiektuak ari gara denon eskura jartzen: Lansarean lan-ataria, Enpresarean, Euskaragileak, Elkarrengandik Ikasiz solasaldiak, etab.

Bai Euskarari ziurtagiria duten komunitateko entitateen ekarpenari esker, batez ere, bideragarria da gure proiektua. Zuk ere babestu dezakezu gure proiektua Bai Euskarari Laguna eginez.

Gainera, Bai Euskarari Elkarteak lehentasunezko mezenasgo jarduera izendapena jaso du Gipuzkoako Foru Aldundiaren aldetik eta, ondorioz, zerga onurak ezarriko zaizkizu egindako ekarpenarengatik (enpresentzako kenkaria, % 18koa; norbanakoentzat. % 30ekoa).

Izan zaitez Bai Euskarari Laguna