13 urteko elkarlana Bai Euskarari Elkartearen eta Zarauzko Udalaren artean

Zarauzko Udalbatza aretoan ospatu dute Bai Euskarari Ziurtagiriaren hitzarmena sinatzeko ekitaldia, Bai Euskarari Elkarteko zuzendaria den Rober Gutiérrez-ek; Nekane Iribarrek, euskara zinegotziak: eta, Xabier Txurrukak, Zarauzko alkateak. Zarautzen 32 establezimenduk dute Bai Euskarari Ziurtagiria eta orain dela 13 urte sortu zen Zarauzko Udalaren eta Bai Euskarari Elkartearen arteko hitzarmen honen bidez, horietako 28 babesten dira.

Rober Gutiérrez-ek, Bai Euskarari Elkartearen zuzendariak, eskerrak eman dizkie Udalari aurten ere hitzarmena berritu dutelako eta Zarauzko ziurtagiridunei, euskaraz lan egiteko eta bizitzeko egunero egiten duten ekarpenagatik. Bai Euskarari komunitatea geroz eta sendoagoa dela nabarmendu du eta elkarlana goraipatu du oraingo eta etorkizuneko giltzarri gisa. Gaur egun, Bai Euskarari Elkartea ziurtagiri bat baino askoz gehiago dela gogorarazi nahi izan du zuzendariak: “gero eta eragin eta arrakasta handiagoa lortzen ari diren proiektuak, tresnak eta baliabideak lantzen, sortzen eta egokitzen ari gara enpresen eta profesionalen eskura jartzeko: Enpresarean, Lansarean, jarraibide egokiak eta abar luze bat”.

Gainera, Euskaraldiarekin gertatzen ari den bezala, Gure lurraldearen eraldaketaz ari garela adierazi du Gutiérrez-ek. “Enpresetan hizkuntzak egoki kudeatzea eraldaketa bat da, enpresarentzat eta baita transformazio-prozesu horietan parte hartzen duten pertsonentzat ere”.

Xabier Txurruka alkateak jakinarazi ditu 32 establezimenduen izenak. Horietatik 4k "Zerbitzua eta Lana Euskaraz" goreneko maila dute, 19ek "Zerbitzua Euskaraz" eta gainontzeko 9k "Bidean" maila.

Bai Euskarari Elkartea eta Zarauzko Udala pozik eta eskerturik agertu dira, lorpenak ikusten ari direlako eta aurrera jarraitzeko gogotsu daudelako. Baina, batez ere, “Bai Euskarari Ziurtagiria duten Zarauzko eta Euskal Herria osoko enpresa, saltoki eta era guztietako entitateak egiten ari diren lanagatik, haien konpromisoagatik, haien ereduagatik, haien eraginagatik eta bide-erakusle izateagatik.

Ziurtagiridunen zerrenda