Euskaraz saiatu eta asmatu!

2018-12-05

#GasteizenBaiEuskarari mintzodromoa ospatu dute Gasteizko gazteek

Gasteizko “11 ber bi festibala”-ren barruan ospatu dute gaur gazte mintzodromoa Oihaneder Euskararen Etxean, hiriko Lanbide Heziketako, Batxilergoko eta IKAko ikasleekin euskaraz eta hizkuntzaren egoeraz hitz egiteko. Euskaraz saiatzea merezi duela adierazi dute parte-hartzaileek eta hizkuntza erabiltzeak bere fruituak ematen dituela frogatu du saioko gonbidatu bereziak, Aiora Mujikak, sare sozialetan @probatxoa bezala ezagutzen dugunak.

Bai Euskarari Elkarteak antolatzen du topaketa, Gasteizko Udalaren eta Arabako Foru Aldundiaren babesarekin, ikasleen arteko harremanak euskaraz sustatzeko eta bizitzako arlo ezberdinetan hizkuntzaren egoeraz eztabaidatzeko.

Launakako taldetan elkartu dira parte-hartzaileak eta arlo ezberdinei buruz mintzatzeko aukera izan dute.

Hasteko, “Minutu bat Interneten, zenbat euskaraz?” gaia aurkeztu zaie ikasleei, eguneroko aisia digitalaren inguruan hitz egiteko eta euskarak hartzen duen lekuaz hausnartzeko. Eztabaida piztu aurretik, Youtubegintzan murgildutako @probatxoa–k bere burua aurkeztu du eta euskarazko bideoak eskaintzeko saiakera egitera animatu ditu gazteak; izan ere, berak zuzen-zuzenean asmatu zuen, bere lehenengo bideoak 85.500 bisita baino gehiago jaso zituela kontutan izanik. Gazteek interesarekin entzun dute Mujikaren bizipena eta gehiengoak partekatu du Youtuberraren iritzia, Interneten, kalean, eskolan edo-eta lanean ere, euskaren alde egiteak merezi duela, alegia.

Bigarren txandan, ingurumen digitaletik, lan mundura salto egin dute gazteek, “Etorkizunerako lanbidea hautatu, lanerako hizkuntza aukeratu” gaiarekin. Aurrekoan bezala, jarrera positiboa nabarmendu da aretoan eta, oro har, ikasle guztiak maila profesionalerako pausoa euskaraz egitearen alde agertu dira, gogotsu.

Ondoren, gaur egungo kontsumo ohitura digitalak partekatu dituzte ikasleek eta Interneteko Google assistant, Siri edo Amazon bezalako laguntzaile birtualen erabilerari erreparatu diete, “Sarean euskal siri izango bagenu...” eztabaidagaia aurrean izanik.

Bukatzeko eta kontsumo ohiturei jarraituta, “Hala erosi, zera irabazi: #LehenHitzaEUS” gaia aurkeztu zaie ikasleei, Gasteizko erosketa moten, kontutan harturiko irizpideen eta erabiltzen duten hizkuntzaren inguruan mintzatzeko.

Ekitaldia amaitzeko, azpimarratzekoa da parte-hartzaile guztiei Baskonia, Alaves eta Araskiren sarrerak banatu zaizkiela.

Gasteizen, Interneten, lanean edo kontsumo garaian, beraz, euskaraz irabazteko asko dutela baieztatu dute ikasleek.

Argazki guztiak hemen:

Izan zaitez Bai Euskarari Laguna

Zure babes ekonomikoa ezinbestekoa zaigu hau bezalako proiektuak lantzen segitzeko eta zuei eskaintzeko.

Bai Euskarari Elkartea lan munduan euskararen erabilera areagotzeko eragiten ari da, Euskal Herri osoan. Bai Euskarari Ziurtagiriarekin hasi genuen ibilbidea eta euskaraz eroso aritzeko proiektuak ari gara denon eskura jartzen: Lansarean lan-ataria, Enpresarean, Euskaragileak, Elkarrengandik Ikasiz solasaldiak, etab.

Bai Euskarari ziurtagiria duten komunitateko entitateen ekarpenari esker, batez ere, bideragarria da gure proiektua. Zuk ere babestu dezakezu gure proiektua Bai Euskarari Laguna eginez.

Gainera, Bai Euskarari Elkarteak lehentasunezko mezenasgo jarduera izendapena jaso du Gipuzkoako Foru Aldundiaren aldetik eta, ondorioz, zerga onurak ezarriko zaizkizu egindako ekarpenarengatik (enpresentzako kenkaria, % 18koa; norbanakoentzat. % 30ekoa).

Izan zaitez Bai Euskarari Laguna