'Heldua zu zara, heldutasunez jokatu' spotak jaso du Gazteen saria Euspot Lehiaketan

2024-06-07
Bai Euskarari Elkartea

Euspot lehiaketaren sari-banaketa ekitaldia egin zen ekainaren 6an, Aretxabaletan. Bai Euskarari Elkarteak Gazteen saria eman zuen: 'Heldua zu zara, heldutasunez jokatu' spotak jaso zuen sari hori, Peru Arrese eta Izadi Zumalde arrasatearren lanak. Zorionak!

Ibon Arrizabalaga de Mingok eman zuen saria, eta hitzaldian esan zuenez, "oso garrantzitsuak dira gaur egun ikus-entzunezkoak. Historian zehar, familia eta eskola izan dira gazteei balioak eta kultura transmititzeko kanal nagusiak. Gaur egun, ordea, aisiaren industriak sekulako indarra hartu du. Bereziki, sare sozialek eta bideo laburrek. Eta horiek, mundu mailako agertokian, erdaraz dira."

"Horregatik, ikus- entzunezkoetan euskara sustatzen duen Euspot lehiaketa estrategikoa da Bai Euskarari Elkartearentzat. Industria gakoari zuzentzen zaiolako, gidoia aldatzeko eskatuz. Eta gazteengana iristen delako, euskaratik eta euskaraz", gehitu zuen.

Parte-hartze handia

Euspot Euskal Herrian aitzindaria da euskara, sormena eta publizitatearen arloa uztartzen eta erreferente bilakatu da euskarazko publizitatearen harrobia lantzen. Ondo errotutako lehiaketa da eta orain arteko edizio guztiak batuta 800 spot inguru jaso dira. 2024ko edizioan Euspoten parte-hartzea handia izan da: guztira 87 lan aurkeztu dira. Aurkeztutako lanen artean, 27 lan 18 urtetik gorakoek eginak dira, eta 60 spot adin txikikoek eginak.

Spot guztiak ikusgai: https://euspot.eus/hemen-dituzue-87-spotak-ikusgai-2/

Izan zaitez Bai Euskarari Laguna

Zure babes ekonomikoa ezinbestekoa zaigu hau bezalako proiektuak lantzen segitzeko eta zuei eskaintzeko.

Bai Euskarari Elkartea lan munduan euskararen erabilera areagotzeko eragiten ari da, Euskal Herri osoan. Bai Euskarari Ziurtagiriarekin hasi genuen ibilbidea eta euskaraz eroso aritzeko proiektuak ari gara denon eskura jartzen: Lansarean lan-ataria, Enpresarean, Euskaragileak, Elkarrengandik Ikasiz solasaldiak, etab.

Bai Euskarari ziurtagiria duten komunitateko entitateen ekarpenari esker, batez ere, bideragarria da gure proiektua. Zuk ere babestu dezakezu gure proiektua Bai Euskarari Laguna eginez.

Gainera, Bai Euskarari Elkarteak lehentasunezko mezenasgo jarduera izendapena jaso du Gipuzkoako Foru Aldundiaren aldetik eta, ondorioz, zerga onurak ezarriko zaizkizu egindako ekarpenarengatik (enpresentzako kenkaria, % 18koa; norbanakoentzat. % 30ekoa).

Izan zaitez Bai Euskarari Laguna